 |
| خوشخبری ،حکومت نے اوورسیز پاکستانیوں کے لیے نئی اسکیم کا اعلان کر دیا |
وزیراعظم شہباز شریف نے بیرون ملک مقیم پاکستانیوں کی ترسیلات زر پاکستان بھیجنے کی سہولت سکیم کو جاری رکھنے کا فیصلہ کیا ہے۔
ذرائع کے مطابق وزیر اعظم نے وزارت خزانہ کو ترجیحی بنیادوں پر ورکرز رمیٹنس انسینٹنوو سکیم کیلئے فوری فنڈ جاری کرنے کی ہدایت کردی۔ انہوں نے کہا کہ بیرون ملک مقیم پاکستانی ہماری طاقت، پاکستان کا قیمتی اثاثہ ہیں۔ انہوں نے کہا کہ بیرون ملک مقیم پاکستانیوں کی خون پسینے سے کمائی ترسیلات زر پاکستان کی ترقی میں اپنا اہم کردار ادا کرتی ہیں جسے مجھ سمیت پوری قوم قدر کی نگاہ سے دیکھتی ہے.
یہ پیش رفت ایسے وقت میں سامنے آئی ہے جب کچھ ہفتے قبل اسٹیٹ بینک آف پاکستان کے نائب گورنر ڈاکٹر عنایت حسین نے مبینہ طور پر خبردار کیا تھا کہ اگر حکومت نے ترسیلات زر پر دی جانے والی مراعات ختم کیں تو مالی سال 2024-25 میں ریکارڈ 38 ارب ڈالر کی ترسیلات کے باوجود، بینکاری ذرائع سے رقوم کی آمد میں کمی واقع ہو سکتی ہے۔۔
وزیر اعظم نے کہا کہ مالی سال 2025 میں بیرون ملک مقیم پاکستانیوں نے تاریخ کی بلند ترین 38.3 ارب ڈالر کی ترسیلات زر بھیج کر 14 برس میں پہلی بار کرنٹ اکاؤنٹ سرپلس کے ہدف کے حصول میں کلیدی کردار ادا کیا۔ انہوں نے کہا کہ ان ترسیلات زر سے نا صرف بڑھتے ہوئے درآمدی بل کی ادائیگی بلکہ زر مبادلہ کے ذخائر میں اضافے میں بھی معاونت ملی۔ انہوں نے کہا کہ بیرون ملک مقیم مزدور سے لے کر کاروباری شخصیات، وطن عزیز ترسیلات زر بھیج کر ملکی تعمیر و ترقی میں اپنا اہم کردار ادا کرتے ہیں۔
وزیراعظم نے کہا کہ بیرون ملک مقیم محنتی پاکستانیوں کی جانب سے بھیجی جانے والی ترسیلاِت زر کی راہ میں حائل رکاوٹوں کو دور اور اس نظام کو بہتر، مؤثر اور سہل بنا رہے ہیں۔
ترسیلاتِ زر نہ صرف پاکستان کے بیرونی کھاتے (ایکسٹرنل اکاؤنٹ) کو سہارا دیتی ہیں بلکہ معاشی سرگرمیوں میں تحریک پیدا کرتی ہیں اور ایسے خاندانوں کی آمدنی میں اضافہ کرتی ہیں جو ترسیلات پر انحصار کرتے ہیں۔
0 Comments