پی ٹی آئی سینیٹر مراد سعید اپنی نشست کھو سکتے ہیں ۔ معروف صحافی کا دعویٰ

 

معروف صحافی مرتضی سولنگی نے انکشاف کیا ہے کہ پی ٹی آئی سے جیتنے والے سینیٹر مراد سعید اگر 60 دنوں کے اندر سینٹ کی نشست کا حلف اٹھانے نا آئے تو وہ اپنی نشست کھو سکتے ہیں۔

مرتضیٰ سولنگی کا کہنا تھا کہ نومبر 2021 میں پی ٹی آئی حکومت نے ایک قانونی ترمیم کے ذریعے یہ شرط متعارف کروائی تھی کہ ہر نومنتخب رکنِ پارلیمنٹ کو 60 دن کے اندر حلف لینا لازمی ہوگا۔ اگر کوئی منتخب رکن مقررہ مدت کے اندر حلف نہ لے تو اس کی نشست خود بخود خالی قرار پائے گی۔

انہوں نے مراد سعید پر تنقید کرتے ہوئے کہا کہ "مراد سعید ابھی تک منظر عام پر نہیں آئے، انہیں چاہیے کہ عدالتوں سے ضمانت حاصل کر کے سینیٹ کے فلور پر آ کر حلف لیں، بصورت دیگر ان کا انتخاب ضائع ہو جائے گا۔

پی ٹی آئی نے یہ شرط اسحاق ڈار کے سینیٹر منتخب ہونے کے دو سال تک حلف نا اٹھانے پر متعارف کرائی تھی۔

یاد رہے کہ مراد سعید اس وقت مختلف مقدمات کے باعث روپوش ہیں اور تاحال سینیٹ کے فلور پر حلف نہیں اٹھا سکے۔